好多人鍾意用音樂或流行歌曲做手機鈴聲，但係工聯會嘅立法會議員KK黃國健就對狼叫聲情有獨鍾，因為貪佢夠大聲。不過，喺上星期四嘅立法會會議上，KK唔記得將電話校去靜音模式，結果莊嚴嘅會議廳突然爆出「呀嗚」一聲，搞到代主席Andrew梁君彥面黑，差啲以行為不檢為由將KK趕出會議廳。

黃國健

KK話當日大約十二點幾，佢嘅手提電話突然響起，由於會議廳當時特別寧靜，所有在席議員都清楚聽到佢電話發出嘅狼叫聲。雖然佢第一時間撳熄個電話，但Andrew仍然面露不悅，警告佢如果電話再響，就會即刻趕佢出會議廳，嚇到佢即刻將電話校番靜音。

經此一役，KK仍唔肯停用「狼叫」電話，事關個鈴聲夠響、夠大聲，佢先聽到人哋打畀佢喎！佢仲自爆以前開會都試過電話響，但主席曾鈺成無乜話過佢，但Andrew就不時同佢投訴個電話鈴聲太難聽，唔通Andrew對狼有偏見？

第一手消息請下載on.cc東網iPhone/iPad/Android/Windows Phone Apps