因應佔領行動，泛民主派早前喺立法會發起不合作運動，除咗杯葛即將進行嘅政改第二階段諮詢外，又拒絕同特首CY梁振英及財爺鬍鬚曾會面，就明年初發表嘅施政報告同財政預算案表達意見。不過，佢哋尋日召開記者會，介紹對兩份報告嘅訴求，又突然「轉軚」話會去信政務司司長林鄭月娥同鬍鬚曾要求見面，莫非佢哋唔記得之前講過乜？

設計圖片及對白

飯盒會二十三名泛民議員召開記者會，宣布將會就施政報告同財政預算案向林鄭月娥同財爺提交聯合意見書，就民生、醫療、交通等十五個政策範疇提出合共一百零二項建議。喺政制改革方面，佢哋建議修訂《防止賄賂條例》第三條同第八條，將適用範圍延伸至特首，防止「曾貪」收受富豪利益醜聞事件重演。

聲稱並未針對財爺

而喺社會福利方面，泛民要求豁免長者生活津貼審查機制、盡快設立全民退休保障等。佢哋又要求政府唔好硬性規定各部門必須每年削減百分之一開支，又要求佢哋喺削減開支時唔好影響臨時工飯碗。

老實講，佢哋之前大大聲話拒絕同CY及鬍鬚曾會面，依家又翻要見鬍鬚曾，咁等於自打嘴巴、死啫，做得好肉酸。

但飯盒會召集人「袋巾傑」梁家傑就話，雖然佢哋之前拒絕特首辦要求，唔肯同CY及財爺會面，但佢哋只係想針對CY而非財爺，所以日內將會去信財爺同林鄭月娥要求會面，討論來年嘅施政報告同財政預算案。不過負責撰寫施政報告嘅係CY而唔係林鄭，佢哋搵林鄭反映意見，又有乜嘢用呢？

第一手消息請下載on.cc東網iPhone/iPad/Android/Windows Phone Apps