自把自為大花筒 民航腐化不堪聞

本報去年踢爆民航處連串大花筒醜聞，揭露呢個航空部門管理鬆懈，設施甩漏，但係供管理層享用嘅康體娛樂設備就一應俱全，包羅萬有，包括專業舞蹈室、超豪「大浴場」、目不暇給「電視城」、勁爆音響「K」房等等，簡直沒有最奢華，只有更奢華。事隔一年幾，審計署終於證實有關設施涉嫌違反守則，問題多多，今次民航處冇得狡辯嘞啩。

事實上，喺審計署發表嘅新一份衡工量值報告中，民航處何止大花筒，簡直就係違規亂紀搞腐敗吖。以前年啟用嘅新總部大樓為例吖，本來獲批准興建嘅樓面面積係二萬二千多平方米，但民航處自把自為額外建多一千五百平方米，話預留日後擴建之用喎，真係呃鬼食豆腐。審計署同時發現大樓不少設施都係擅自興建，例如處長辦公室洗手間及淋浴設施、會議及康樂多用途室等，而最離奇嘅係，產業署早已表明不同意興建淋浴設施，但係民航處堅持興建，建築署亦照批圖則，唔通處長沖涼真係咁重要？唔沖涼就做唔到嘢？

仲有吖，民航處耗費九千七百萬元購置家具及設備，其中價值逾六千七百萬元嘅保安及電子系統係先斬後奏，而購置嘅一百四十三部液晶體顯示器，亦較獲批嘅五十部多出近兩倍。最諷刺嘅係，民航處享樂設備一流，航空管理系統卻九流，本應前年啟用嘅新空管系統至今未能通過測試及驗收，舊系統被迫勉強服役，處理量已經超出上限，監測數據出問題嘅次數仲與日俱增添，諗起都牙煙。

講到呢度，太一叮思疑家陣香港係一國兩制定一國一制。唔係咩，民航處假公濟私揮霍無度，咁同內地貪官冇乜分別嘅咋。正所謂，物必先腐而後蟲生。大家咪看輕民航處嘅亂象吖，千里長堤，潰於蟻穴，今日可以隨意違規貪圖享受，他日難保唔會做出更腐敗更荒唐嘅行為。講真，民航處烏煙瘴氣，醜聞唔止咁少o架。本報曾經踢爆該處員工經常到香港飛行總會駕駛定翼機，但係活動同民航處日常工作風馬牛不相及，懷疑有人用公帑玩樂，審計署不妨查查，隨時又有新發現o架。

冇符啦，自從出咗前特首貪曾同埋前廉政一哥貪湯，官場烏煙瘴氣，急速同內地接軌，大有大貪，細有細腐，香港仲邊有淨土吖，叮！