政壇：搞搞政：議員座駕食「牛肉乾」 張賢登唔認累街坊
執達主任周二於中信大廈出入口「清障」，令龍匯道交通重新開通，但通往立法會停車場嘅添美道仍然被佔領，因此立法會議員嘅座駕除咗泊喺附近合法車位外，有啲就違泊喺中信大廈對出迴旋處旁行人路上。據聞，尋日有四人被抄牌硬食「牛肉乾」，有傳「中招」者包括金融界吳亮星（星爺）、泛民議員湯家驊及黃毓民，明查暗訪更發現，「累街坊」嘅「元兇」，據講係「清障」當日有份現身嘅白鴿黨成員張賢登。
多名議員嘅座駕泊在行人路上，司機在車旁等候。
吳亮星嘅座駕未及時駛走，被警員即時「抄牌」。
陳克勤（右）聞抄牌後趕至，駛走泊喺行人路上嘅私家車。
星爺想向戴耀廷追討
張賢登接受查詢時證實，其座駕於昨晚六時四十五分左右，於中信大廈露天停車場非泊車位上落發電機，前後只用十五分鐘左右，就被警員抄牌，因此要求警員對附近一帶行人路嘅違例泊車都公平執法，佢再三強調「累唔累街坊唔係我引發」。
不過，附近涉違泊嘅車輛唔少屬議員座駕，有人「聞風」及時駛走車輛，亦有車輛接載建制派議員梁君彥、梁志祥、陳婉嫻等人。不過，抄牌時星爺座駕並無駛走。星爺同湯家驊事後證實其座駕被「抄牌」，星爺形容為無妄之災，不排除會參照個別人士嘅做法，入稟小額錢債向佔中發起人戴耀廷追討賠償。
至於湯家驊亦感到「少少無辜」，並透露事件另一版本，就係源於有人嘅座駕泊咗喺中信附近露天停車場嘅傷殘人士泊位，其後被警員抄牌，有人不滿並要求警員對附近嘅違例車輛公正執法。
