政壇：長毛膽痛留院謝絕探訪
最近立法會議員真係病痛多，繼社福界議員張國柱早前被確診患上胃黏膜淋巴瘤，要向立法會申請放兩個月假接受電療後，尋日社民連梁國雄（長毛）又喺立法會大會前夕突然身體不適，需要由救護車送院。
「長毛」梁國雄尋日朝早因膽痛而召救護車送院，上車時表情痛苦。
長毛話膽痛唔舒服，社民連副主席黃浩銘探完病之後，就話長毛謝絕探訪，令成件事添上幾分神秘。
立法會前日凌晨遭示威者衝擊，令大會延至尋日舉行。會議在朝早九點鐘舉行，長毛臨近八點鐘突然致電秘書處，話自己身體唔舒服，要求代為召喚救護車，並由助理陪同送院。長毛上白車時神志仍然清醒，但就面青口唇白，仲不斷嗌話好痛，未知係咪同膽石有關，情況令人擔憂。
黃浩銘隨後到長毛入住嘅瑪麗醫院探病，佢話長毛膽痛，需要留院檢查，前後打咗兩支止痛針，暫時冇咩大礙，今日再見多次醫生。黃又話，本來社民連其他成員都想去探長毛，但長毛謝絕探訪，無交代原因。近年長毛已好少玩衝擊，近期又頻頻在佔領區做和事佬，莫非真係個「膽」有事？
