政壇：樹根fb 帳戶極速摺埋

話說樹根尋日突然喺Facebook（fb）開設新帳號，仲鬧爆網站無理封殺佢兩個帳戶，粗暴打壓言論自由。嘩！事件提升到言論自由，唔通有冤情？樹根話，早前因為反「佔中」而unfriend（取消交友）咗部分粗口橫飛嘅「黃絲帶」支持者，唔知係咪因為咁，佢被報復舉報，兩個帳戶無故被刪除，大拿拿冇咗成萬個「朋友」，認真陰功。樹根仲話，不滿網絡世界被人欺凌，極速開番個新帳戶求「復活」，但唔夠幾個鐘又宣布摺埋；反而「鍾樹根收皮王專頁」仍然健在，難怪樹根激到紮紮跳。