政壇：田二少猛呻傳銷電話煩
立法會議員田北辰（田二少）因為港鐵讓座一議成為話題人物，尋日喺立法會，佢又拋出新建議，今次係針對由傳銷人員駁打嘅電話，佢要求政府規管，仲好激氣話有時去歐洲每日收到三、四個促銷電話，每接一次就收港幣大約二十八元，每日淨係聽呢啲電話已經唔見約一百元，大呻「好重皮」！以田二少嘅財力，呢啲費用真係濕濕碎，但滋擾就唔輕，可惜政府話若要規管真人打出嘅促銷電話較為複雜，無意接招。
設計圖片及對白
每日收多個白撞電話
田二少話，港人每人一年收到一百五十個促銷電話，生活受到嚴重滋擾。以佢為例，每日都收到四、五個「白撞」電話，例如有財務公司問佢要唔要借錢、教育機構推銷英語進修課程，甚至有人問佢要唔要入老人院，同一間公司隔日就打來，唔怪得佢咁激氣啦！佢又話，最離譜係有男同事收到推銷子宮頸癌檢查服務，真係唔知好嬲定好笑。
議員黃定光話，對田二少嘅經歷感同身受，皆因佢去外國都收過「午夜凶鈴」。商務及經濟發展局局長蘇錦樑回應時，只係話規管真人促銷電話較為複雜，建議大家喺外國時夜晚熄電話，咁就可以減低金錢上嘅損失喎。唔知咁樣算唔算斬腳趾避沙蟲呢？
其實，近年圍繞電話嘅投訴及問題真係好多，譬如通訊事務管理辦公室過去一年，即去年十一月至今年十月期間，就收到一千一百二十五宗涉及電訊服務計帳嘅糾紛投訴，消費者委員會同期更收到三千八百六十二宗，大部分個案涉及流動電話服務及流動數據服務，呢啲應該未計算好似田二少呢種喺外國無啦啦接電話中招嘅人，睇嚟政府即使顧慮多多，都要喺電訊規管事務上行多幾步至得。
