配套不齊百物貴 悲情城市更悲情

嗱，港府成日話要大力發展新市鎮，一來解決房屋問題，二來創造就業機會，講就好聽咯，實情得個噏字咋。好似天水圍同東涌咁吖，發展咗咁耐，配套規劃依然天殘地缺，連街市都欠奉。立法會公眾街市事宜小組委員會尋日舉行首次會議，議員炮轟東涌及天水圍市政設施不足，其中天水圍基本由領匯壟斷，物價貴過市區多多聲；而東涌仲誇張，由於跨區車費昂貴，有居民利用長者兩元乘車優惠，提供長者代買餸服務，問你服未。

其實，居民嘅要求好簡單，就係希望食環署喺東涌及天水圍興建新街市，商戶有競爭咯喎，物價自然有下調空間喇。點知食環署一口拒絕不特止，仲大講風涼話，聲稱建設新街市首要考慮係區內有冇同類設施，仲話街市數目愈多，唔代表物價愈平。至於東涌咯喎，雖然房協會有新街市落成，不過究竟要等到何年何月，食環署十問九唔知。

所以話，港產官僚涼薄成性，成個現代晉惠帝咁款，點會關心民間疾苦吖。講真，天水圍及東涌物價之高，真係唔講得笑。有調查指出，天水圍嘅生活必需品價格較鄰近嘅元朗貴三成，食品更加貴五成，而東涌嘅物價亦較荃灣區平均高出一至兩成。大家都知，天水圍係全港最貧窮地區之一，東涌亦有三成人口攞綜援，喺咁嘅情況之下，兩區居民仲要捱貴餸，連食都冇啖好食，有乜辦法唔悲情吖！

講開又講，天水圍及東涌又點止欠缺街市咁簡單，交通、學校、醫院、體育、休閒等公共設施，冇一瓣唔缺。好似公立醫院咁吖，東涌話就話舊年開咗一間，但到家陣都係得急症室服務及少量住院床位咋；天水圍仲衰，醫院要後年先至落成，到時人手係咪足夠仲係未知之數。仲有呀，新市鎮職位不足，居民被迫跨區返工，費時失事，淨係交通費都去咗一大橛，唔怪得在職貧窮家庭愈來愈多喇。

咁講啦，香港房屋問題愈演愈烈，發展新市鎮冇人話唔啱，但必須全盤規劃，提供配套設施。港產官僚拓土建屋往往閉門造車，唔搞到一鑊泡就奇喇，叮！