城中鏡：吞併藥企失敗 大鱷阿克曼照賺
美國藥廠Actavis豪擲660億美元，收購抗皺肉毒桿菌（Botox）生產商Allergan，係今年最大宗藥企併購，意味維權大鱷阿克曼夥拍加拿大藥廠Valeant吞併Allergan嘅行動，喺多次提價都食檸檬後正式宣布失敗。不過，市場話阿克曼透過呢單Deal完美演繹乜嘢叫「公我贏，字你輸」，點解？
阿克曼收購失敗照賺大錢。（資料圖片）
話說阿克曼喺Valeant四月第一次向Allergan提購時，已經持有Allergan接近10%股份，隨着阿克曼同Valeant不斷提高叫價，Allergan股價一路水漲船高，獲Actavis收購股價更大升5.31%，較阿克曼當初嘅入股價高65%，阿克曼大賺22.8億美元（約177.8億港元）。
阿克曼做呢單Deal冒好大險o架，依家美國證交會仲查緊佢係內幕交易，Valeant成功咗隨時由買家變被告。不過，依家實情似乎係阿克曼利用Allergan當佢同Valeant洪水猛獸，不斷抬高Allergan身價，衰咗，表面上無彩攞，但實情大賺咗一筆，真不愧為大鱷。
或者阿克曼心知Valeant勝算唔大，佢靜靜雞吸納寵物家禽疫苗「一哥」Zoetis近10%股份。市場炒作Valeant可能會轉吼Zoetis，刺激Zoetis股價上升，又賺一筆。
