城中鏡：華誼兄弟 食「騰雲」兩家茶禮
騰訊主席馬化騰同阿里主席馬雲喺內地科網與電商行業激鬥連場，同佢哋合作嘅公司亦經常被指，要喺「騰、雲」兩大陣營作出合作選擇。不過凡事都有例外，喺深圳上市、從事電影製作嘅華誼兄弟，就示範了何謂左右逢源，成功同時引入馬化騰同馬雲作為股東，但又可以各自與騰訊同阿里開展性質近似嘅合作。
騰訊主席馬化騰
阿里主席馬雲
電影粉絲對華誼兄弟應該唔會陌生，佢哋出品過多套又有票房又有口碑嘅華語電影。今次能夠左右逢源，係因為華誼配股，騰訊、馬雲私人持有杭州阿里創投、平保旗下平安資產同中信建投變成股東。其實馬化騰同馬雲一早已經係華誼股東，今次係增持，但華誼又做得好「得體」，增持之後兩人持股相同，冇多冇少都係8.08%。唔單只股權「平等」，華誼亦會分別與騰訊同馬雲旗下嘅阿里系，開展電影同新媒體等內容嘅合作。
華誼何解能左右逢源？原來馬雲私人參與嘅雲鋒基金，多年前已經入股華誼。騰訊喺一一年能首次入股華誼，更係拜雲鋒基金願意減持所賜。騰訊同阿里近年競爭趨於劇烈，亦無損華誼與兩者嘅合作關係。
