城中鏡：鄧鉅明如來神掌 打造第二梯隊
太子珠寶鐘錶前日舉行三十周年晚宴，數以千計政商界名人齊去見證開心時刻，主席Jimmy鄧鉅明同太太鄧宣宏雁成晚滿場飛，喜悅之情寫在臉上。Jimmy話回首過去三十年，公司由尖沙咀樓梯底嘅鐘錶行開始，一步一腳印取得今日的成就，殊不容易。展望未來，鄧太話希望下一步可以打響自家珠寶品牌，做到鐘錶同珠寶業務並駕齊驅。
鄧鉅明（右二）、太太鄧宣宏雁（左二）同大仔鄧亦軒（右一）、次子鄧亦棋（左一）攜手邁向下一個三十年。
莫華倫（左）專程由北京返港獻唱，右為莫太邱文伶。
霍震寰（中）、金銀業貿易場理事長張德熙（右）同中華廠商聯合會候任會長李秀恒喜相逢。
Jimmy感慨話覺得非常欣慰係鄧家第二梯隊已經形成，包括佢兩個仔亦軒同亦棋，仲有姪仔同外甥都返公司幫手，佢哋能力好強，彼此關係好好。佢仲不失搞笑本色，話等佢好似施展如來神掌咁，將啲真功夫過晒畀第二梯隊，咁就掂喇！
霍震寰爆大家姐抱孫
中華總商會永遠榮譽會長霍震寰都有到場，佢笑笑口話最近咁啱有幾個組織慶祝成立三十周年，認真唔容易。問佢屋企最近有冇喜事？佢爆料話大家姐霍麗萍啱啱添咗個孫女。咁幾時輪到佢飲新抱茶呢？佢搞笑話：「係喎！點解都冇乜消息？」睇嚟阿仔霍啟文要加把勁嘞!
當晚現身嘅政商名人仲有「玩具大王」蔡志明夫婦、莎莎國際主席郭少明夫婦同鐘錶界人士等。節目雅俗共賞，包括大提琴家李垂誼同男高音莫華倫難得一彈一唱，眾人聽得如癡如醉。
