望到頸都長嘅滬港通，終於喺前日正式開通，但市場嘅反應似乎麻麻，資金更係「南水北調」，睇嚟益咗上海多過益香港。一路以嚟力挺滬港通嘅立法會金融服務界議員張華峰，尋日同傳媒聚會時話仍然睇好滬港通，喺滬港通效應下，港交所都應該會受惠，而近期股價受壓，只係市場仲未習慣啫！

設計圖片及對白

信李小加唔做蝕本生意

張華峰講講吓，突然間收到經紀嘅電話，話港交所跌咗兩蚊，佢即刻諗都唔諗，就同經紀講掃一萬股貨。若果以尋日港交所嘅收市價計算，佢幾秒間已豪花一百七十幾萬元掃貨，完美演繹乜嘢叫「秒秒鐘幾十萬上落。」佢話股市交投量增加，點都對港交所有利無害，仲讚港交所行政總裁李小加好識搵錢，睇死李小加唔會做蝕本生意。

講起證券業界，早前有傳政府話會擴闊立法會金融服務界功能組別嘅選民基礎，令多啲人可以投票，但張華峰話最新消息應該係維持不變，因為北京對今次佔領行動好有意見，所以連小小甜頭都唔畀香港。如果根據呢個邏輯，滬港通算唔算係甜頭呢？究竟係好事定壞事呢？

第一手消息請下載on.cc東網iPhone/iPad/Android/Windows Phone Apps