政壇：林新強復出撐調解
香港律師會前會長Ambrose林新強早前因公開力撐「一國兩制」白皮書同「法官愛國論」，又喺電台大讚「共產黨好偉大」等，引起部分律師會會員不滿。後來律師會召開特別會員大會，以大比數通過不信任Ambrose動議，最終佢宣布辭去會長一職。久未露面嘅Ambrose尋日終於復出，出席由立法會議員梁美芬牽頭搞嘅記者會，提倡用調解方式解決社會紛爭。
香港律師會前會長林新強（左）昨會傳媒。
Ambrose話見到政府過去幾年支持調解工作，又認為調解對社會有好處，所以由唔支持調解變咗支持。問到大律師公會近月接連就各項政治議題表態，更就佔領行動發表聲明，反而律師會就冇乜搞作，Ambrose話佢之前件事對律師會都有一定影響，亦令律師會撕裂，希望大家畀啲時間律師會，而佢自己都有繼續返律師會開會。
梁美芬就話希望今次能夠起帶頭作用，鼓勵社會透過調解解決政治紛爭。不過，佢講明調解唔適用於刑事訴訟，收費亦視乎唔同調解員而定添！
