政壇：余漢坤拒接岳父發叔棒
究竟邊個接劉皇發棒做新界鄉議局主席呢？發叔早前就打晒開口牌，話打算將立法會議席交棒畀後生仔，更點名話女婿、信和置業董事總經理Randy余漢坤有興趣接棒添！不過，雖然發叔有心，但似乎女婿無夢，Randy回應獲發叔「祝福」時竟然話冇認真考慮過，仲話參選「not in my agenda（不在我議程之列）」。
余漢坤話接替劉皇發參選鄉議局立法會代表「不在我議程之列」。
劉皇發
Randy尋日出席鄉議局執委會會議，對於台上嘅發叔有意將來屆立法會議席交畀自己，佢竟然話：「未知呢件事，未有回應」，又自言對議席興趣唔大，「要同爸爸（發叔）傾咗先」。發叔會後亦打倒昨日的我，話交棒畀女婿只係講笑啫，「唔好整蠱人哋啦！」咁邊個先係真命天子呢？
講開鄉議局，向來心繫家國嘅新界二十七鄉早前響應呼籲，為「還路於民」反佔中簽名運動收集近二萬六千個簽名，其中以副主席林偉強最有心有力，單係佢一個人就收集咗六千個簽名，佢話個個簽名都冇花冇假，經得起驗證喎。
