被指為「搞事四人幫」成員嘅「李漢奸」白鴿黨創黨主席李柱銘同「民主阿婆」前政務司司長陳方安生,向來鍾意就香港事務指指點點,又去外國「唱衰香港」兼乞求干預,但隨着兩人嘅政治能量已微乎其微,屢遭外國冷待;而喺近期佔領行動中,兩人更加無人理會。港大最新民調嘅結果就係最好證明,兩人齊齊跌出十大市民最熟悉嘅政治人物,兩粒「舊電池」已經被人遺忘,連回收都慳番!

「唱衰香港」 屢碰一面灰

佔領行動持續五十多日,港大民意研究計劃喺上月三十一日至本月五日,透過真實訪問員以隨機抽樣方式,成功以電話訪問一千零八名市民,被訪者喺無提示下講出最多十名最熟悉嘅政治人物,結果發現最多被訪者提及嘅首三名政治人物,依次為特首梁振英、政務司司長林鄭月娥同社民連梁國雄,而早前被「搣柴」褫奪全國政協委員資格嘅富貴黨前黨魁田北俊,就重新打入十大,仲排名第八添。不過,熟悉度同支持度並非掛鈎。

調查結果有升自然有跌,李漢奸同民主阿婆呢兩名過氣政治人物雙雙跌出十大排名,事實上,李漢奸同民主阿婆嘅泛民光環隕歿有迹可尋,舉例指二人於今年七月訪問英國「唱衰」香港,疑碰到一面灰遭到英方冷待,李柱銘結束訪英行程返港呻到樹葉都落,「大呻」英方為經貿利益不願得罪中國,因此未能與較高級的官員會面。

及至最近佔領行動持續多時,李漢奸同民主阿婆都角色欠奉,前者無乜建議獲佔領人士採納,後者絕少喺佔領區出現,最多只係加把口「抽水」,最新調查顯示二人在市民熟悉度大跌,反映二人嘅影響力已經近乎零,如果有自知之明都係自動「摺埋」好過。

別遺忘貪曾 廉署要做嘢

值得一提嘅係,「貪曾」前特首曾蔭權爵士喺今次調查排名直線下跌,由上次排名第四下跌至第九,驟眼睇好似畀市民逐漸遺忘,但最唔應該遺忘佢嘅係廉政公署,事關貪曾貪盡海陸空、歎盡省港澳嘅醜聞已調查將近三年,真係乜都查個水落石出啦,係咪應該盡快向市民交代呢?

第一手消息請下載on.cc東網iPhone/iPad/Android/Windows Phone Apps