科技日新月異，連電話黨騙徒都要與時俱進，可能見「猜猜我是誰」、「先借錢、後過數」呢啲舊橋已經好難得手，佢哋實行升呢，轉攻即時通訊同社交平台程式，盜用他人帳戶作案。市民一個唔好彩中招，私隱被侵犯之餘仲要做埋不法分子嘅「幫兇」，都咪話唔大鑊。

其中一單畸士係咁嘅。有位平時唔會上網買嘢嘅市民，前排突然收到朋友電話，話未幫佢買到網上購物平台充值卡，細問之下，至知原來自己嘅即時通訊平台戶口被人盜用咗。除此之外，騙徒仲有一招叫「打盲毛」，利用即時通訊戶口隨意向陌生人發「你係邊個」、「換咗電話，冇晒啲Contact」等訊息，套取對方資料作非法用途，受騙破財兼受辱嘅市民唔係少數。

嗱，警方數字顯示，今年一至六月接獲嘅社交媒體騙案高達四百六十六宗，比舊年同期勁升三倍，其中涉及即時通訊應用程式嘅個案超過三百宗。由於好多市民受騙都唔會報警，呢啲數字好可能只係冰山一角嘅咋。

騙案數字一年翻幾番，連電子商務業界都承認，問題已經非常嚴重。最得人驚嘅係，同其他交易方式唔同，依家有啲即時通訊軟件唔會喺多次輸入錯誤密碼後封鎖帳戶，騙徒可以任撞唔嬲，同中門大開冇乜分別。市民除咗密啲更換密碼，同埋收到可疑訊息後向對方核實，根本冇咩可以做。

即係咁，智能手機愈來愈普及，使用即時通訊嘅人愈來愈多，詐騙黨又點會放過呢個咁大嘅市場吖。所以話啫，當局係時候加強監管同執法啦，唔好話打擊詐騙錢財，淨係偷窺私隱都不能坐視喇，係咪！

不過盞嘥氣啦，騙徒都仲話識與時俱進，港產官僚出名墨守成規，莫講話即時通訊同社交平台呢類新潮嘢佢哋唔識管，就算真人推銷電話，即使市民早就不勝其煩，要求立例規管，當局仲係好似借咗聾耳陳隻耳咁，到依家都冇厘聲氣。話時話，香港係就係有專門法例、有專職衙門保障個人私隱，可惜法例形同虛設，個人資料洩漏事件無日無之，唔少甚至涉及政府部門添，都唔知好嬲定好笑。

咁講啦，一為神功，二為弟子，當局實在好有必要嚴打網絡行騙，事關唔少港產官僚自己都係「盲毛」，萬一畀騙徒點咗去網上購物，到時求唔求助好呢？叮！

第一手消息請下載on.cc東網iPhone/iPad/Android/Windows Phone Apps