政壇：搞搞政：佔鐘留下爛攤子部門收拾抓爆頭
佔領行動持續逾五十日，獲法庭頒布禁制令嘅金鐘中信大廈今日率先清場，相信旺角佔領區跟隊「清除障礙物」亦不遠矣。雖然金鐘佔領區短期內仍然平安大吉，但即使他日人去樓空，現場留低大批示威物品同遭受破壞嘅政府財物，點樣收拾殘局兼開通車路都夠各政府部門抓爆頭。
設計圖片及對白
金鐘佔領區佔地甚廣，涉及嘅政府用地、財物種類多不勝數，但佔領期間示威物品周街貼、周街擺，甚至曾有街燈被偷電，善後工作絕對唔係搵外判清潔商掃垃圾咁簡單。單係添馬公園及附近一帶，就由李美嫦任署長嘅康樂及文化事務署署長及陳維安統領嘅立法會秘書處分別管理，兩個帳篷落入唔同管轄範圍，殊途從此未必能同歸喇！
財委會被癱瘓 申撥有難度
俗稱「公民廣場」嘅政府總部東翼前地內外範圍，就歸行政署署長蔡潔如管轄，加上貼滿市民願望嘅港版「連儂牆」，要清理都唔係一朝一夕嘅事。而警方清場後，路政署署長劉家強都要派人到場檢查街燈運作、路況安全等，所以各部門都要着手諗計點樣配合警方行動，以最快速度恢復金鐘秩序。
連月佔領發生多次警民衝突，期間示威者曾以垃圾桶等政府財物作為路障，事後唔少垃圾桶都要報廢再買過，呢啲政府財物都由唔同部門擁有，有部門就慨嘆佔領人士為數咁多，想追究善後責任或費用都唔知搵邊個，惟有部門自己諗掂佢。立法會財務委員會復會後被泛民主派嘅「不合作運動」癱瘓，睇怕即使部門想申請撥款都係唔好嘥氣，自己勒緊褲頭諗吓條數點度好過喇！
