立法會尋日宴請二十四位駐港總領事及十一位名譽領事，雖然英國駐港總領事吳若蘭無出席，但上任以嚟一直動作多多嘅「小八國聯軍」美國駐港總領事夏千福就照樣出席。

夏千福（左）向葛珮帆（右）自爆依家唔可以打寶藍色或黃色呔，以免向港人傳遞錯誤訊息。中為德國駐港總領事Nikolaus Graf Lambsdorff。

不過，夏千福就繼續「封口」拒評佔領行動，又喺宴會廳向議員呻話依家唔可以打黃色或藍色呔，費事被人以為佢偏幫任何一邊喎。由於立法會大樓外道路仍被佔領者堵塞，一眾領事要行過中信大廈上車離開。

德領事改口批佔領違法

議員EQ葛珮帆話午宴結束後，當眾人逐一離開宴會廳時，夏千福就「無啦啦」向佢自爆近日每朝起身揀衫時都要好小心，唔可以打寶藍色或黃色呔，以免向香港市民傳遞錯誤訊息。不過，EQ隨即發現夏千福着咗件粉藍色恤衫，夏即時尷尬話粉藍色唔算係藍色喎，做乜搞到咁驚青呢？又好難怪嘅，連美國總統奧巴馬都唔敢當住中央官員面評論佔領行動事件，又點輪到一個小小嘅夏千福出聲呢？

德國駐港總領事Nikolaus Graf Lambsdorff之前喺慶祝德國統一二十四周年紀念日酒會上用德文致詞，話香港人應為年輕一代感到自豪，被外界詮釋佢支持佔領行動。佢尋日就澄清當日並唔係想稱讚佔領者，又批評佔領者佔領道路係違法行為喎。

第一手消息請下載on.cc東網iPhone/iPad/Android/Windows Phone Apps