政壇：立會零動議懶蟲有理
除咗審議撥款及法案，立法會議員嘅職責仲要向政府提出質詢，同埋就社會爭議事項動議辯論。立法會秘書長就公布，截至尋日七十名議員究竟提出咗幾多次議員議案辯論，發現鄉議局「發叔」劉皇發、地產及建造界「大舊石」石禮謙、漁農界「高佬賢」何俊賢兩個立法年度都未曾提出過議員議案，莫非佢哋真係咁忙？定係想做大懶蟲呢？
設計圖片
有啲排咗八次都排唔到
喺三名議員中，高佬賢係新人，冇理由表現咁差？我哋問過佢，其實係因為「未到時機」。原來佢上年度本來想動議辯論特首《施政報告》中提出檢討農業政策，點知由四月辯論預算案開始就一直「拉布」，唔少議員索性撤回議案，所以嚇到佢唔敢提，費事排到但又冇機會討論。高佬賢已經叫助手入咗紙，明年一月提出議案，促請政府關注農業發展。
其餘兩人都係議會老手，其實發叔一向都係立法會「四大懶蟲」之首，其餘三人今屆退出議會後，佢就依然保持個性。自九一年有紀錄以來，佢都未曾提出過議員議案，都算係政界「奇葩」，除咗舊年十二月提出將大浪西灣剔出郊野公園決議案，但佢尋日未有回覆查詢。
至於主力業界議題嘅大舊石，就澄清自己有提過議案，只係抽唔到啫。咁就奇嘞，點解秘書處無紀錄嘅？大舊石就話要問問助手，又話考慮動議辯論教育政策喎，但就冇講詳情喇！至於航運交通界議員易志明都冇提過動議辯論，但只係入咗紙排隊最終排唔到啫。此外，其他議員好多都提過一次或兩次動議辯論，有啲仲排咗八次都排唔到添！
