城中鏡：鄭泳舜抱仔攀石惹虛驚

尋日見到深水埗區議員Vincent鄭泳舜嘅太太，喺社交網站上載咗Vincent同三個囝囝玩攀石嘅相片，相中嘅Vincent抱住孻仔，然後靠雙手繼續向上搵支撐點，雖然有網民大讚Vincent好勁，但睇真啲似乎係有驚無險就真。

鄭泳舜

鄭泳舜（左一）抱住孻仔攀石嘅相片，引來網民讚勁。（互聯網圖片）

Vincent話呢張相係早前同囝囝參加幼稚園秋季旅行時，由太太親自操刀拍攝，又自爆一切只係影相角度問題，其實呢幅攀石牆連一層樓嘅高度都冇，因此自己只係抱住孻仔，企高咗一級喎。佢仲話如果真係抱住囝囝攀石唔應該形容為好勁同好犀利，應該係十分危險至真，奉勸大家千祈唔好試。