SUN搞作：打橫嚟講：違法自首的法治原則

佔中發起人三子已準備去「自首」，噢！佢哋事先講定過，話係知道「佔中」是「違法」的「公民抗命」，所以，事後定必會去自首嘅！

嗱！呢三條友仔「自動」去自首，因佢哋明知係違法的嘛！咁去自投羅網，屬天公地義之事，但香港乃法治之區，好應講求「法治精神」和「法治原則」，咁！問題就嚟啦！

究竟，佔中的「違法」定義係點o架呢？

一大棚曾出現、停留、前往過「佔領區」的群眾，是否一定違了法的呢？如果，呢班人「立心」佔中（依家，不是「中環」，而係金鐘老銅旺角的了！）咁佢哋可算是「犯罪者」啫！但沒立心，卻實則上有佔過中的，又如何？例如，阿媽見個女佔中瞓街，擔心上嚟，即使不同意個女咁做，卻晚晚陪着個女，瞓埋旁邊，或無瞓着，但有佔領街頭，咁佢算唔算違法？

另外，有退休過氣差佬，本身係十分反佔中的，但又日日夜夜走過去「佔領區」，戙咗喺街道中間與佔領者「對壘」，佢咁「正義行為」，又是否算阻路的「佔領人士」呢？

上述的，確是真人真事，不知法律責任點計！還有，「佔中」係計「質」的，還是計「量」的，例如，「立心」在佔領區佔一兩分鐘作表態支持，及唔覺意喺佔領區坐咗半粒鐘，咁邊個大罪啲呢？真係o架！有朋友話我知，佢嗰日行過夏慤道一個帳幕，有條友叫住佢，話自己肚痛要去廁所，叫佢幫手看住一陣，點知一去半粒鐘，此時，有記者將佢拍攝入鏡登咗喺報紙上，咁點算？又有學生去咗佔領區自修室溫書或幫手掃地，又算唔算佔中犯法呢？

咁多疑問，問邊個好呢？誰人識答？

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府