早前學聯力推泛民議員辭職公投，泛民主要黨派紛紛放風對此有保留時，唯獨少咗俗稱「超級區議會」嘅區議會第二界別議員KK馮檢基回應，原來佢早前去咗英國睇兒子嘅藝術裝置展覽，上周先返回香港。對於五區總辭定超級區議員辭職嘅問題，KK嘅回應有啲模棱兩可，一時就話佢所屬嘅民協冇乜嘢發言權，一時又話五區總辭喺技術上有較多問題，兜兜轉轉都係冇明確表態。

設計圖片及對白

稱佔領無損與街坊關係

KK其後帶出更多拗來拗去都未解決嘅問題，如發動辭職公投最難就係要搵到合適議題，舉例指倘以撤回全國人大常委會政改決定作議題，早排「廣場公投」已證明咗係搞唔成；如問及市民接唔接受政府提出嘅政改方案，泛民之前簽咗否決方案聯署聲明，唔通市民贊成「袋住先」，泛民就要打倒昨日嘅我等。

不過，講到佔領行動對民協有無影響，KK語氣就轉趨堅定，直指民協同街坊嘅關係唔係風吹雨打可影響到。究竟係真係假？明年區議會選舉結果將會畀到答案大家嘞！

第一手消息請下載on.cc東網iPhone/iPad/Android/Windows Phone Apps