政壇：謝凌潔貞帶病上陣
有傳教育局局長吳克儉同教育局常任秘書長謝凌潔貞不和，呢個係官場嘅公開秘密，近日更傳出有人要求調去其他政策局，消息傳出後，兩名當事人都未公開回應，撞啱謝太尋日出席自資高等教育聯盟二十周年慶祝活動，擔任主講嘉賓，以為點都會講兩句闢謠，但由於謝太一早話自己唔舒服打底，致辭後就封口離開現場。
謝凌潔貞帶病出席活動，離開時無回應同吳克儉嘅不和傳聞。
講番個活動，成個論壇以英語發言，向來口才唔錯嘅謝太喺台上講嘢頻頻「倒帶」，連佢自己講講吓都發覺唔對路，主動話自己今日唔舒服，所以講英文時文法出錯。不過，雖則謝太稱病，但仍然講足三十五分鐘，較其餘兩個講者長一大截，趁機提醒各院校未來面對人口下降時，最緊要係識得變通，由此看來，帶病上陣嘅謝太對主辦單位認真係畀足面。
