喺過去一個多月，支持同反對佔領行動嘅團體頻繁「過招」，其中反佔中團體最有回響嘅兩招，分別係簽名行動同大遊行，不過原來反佔中團體主腦諗頭多多，仲有多招喺口袋備而不用，但唔好以為係等待適當時候先出招，而係有關建議太過瘋狂，未見光已被反佔中團體內部叫停。

據聞反佔中團體有三項未曝光嘅建議，內部醞釀時已被叫停。首項建議係反佔中團體諗住拉隊衝入金鐘佔領區，同學聯領袖當面辯論，不過思前想後，避免一入佔領區就敗興而回，不消一會就畀反佔中團體軍師勒住。

至於另外兩項瘋狂建議，其中一項係打算率眾踩入三大佔領區，向佔領人士「倒舉拇指」，示意撐警嚴正執法，而另一項就係去佔領區收集反佔中簽名，可惜呢兩項建議極盡挑動佔領人士嘅神經，一不小心，隨時會火上加油，添煩添亂，結果有關建議自然係束之高閣，唔提就當唔存在嘞！

第一手消息請下載on.cc東網iPhone/iPad/Android/Windows Phone Apps