泥鯭的淪水貨車 公路炸彈危危乎

唔係講笑o架，近期有水貨集團為咗掩人耳目，同埋博走多幾轉，居然以泥鯭的走水貨，由上水直奔落馬洲支線出入境管制站，大模廝樣，如入無人之境。呢啲泥鯭的話就話係的士，查實同貨車冇乜分別，淨係車尾箱咋，閒閒哋都有三、四十件貨，就算塞唔落都夾硬嚟，搞到車尾箱冚唔埋，求其搵條橡筋固定就算數，睇見都牙煙。

的士變貨車，超載唔使講，最危險係倒後鏡同兩邊側鏡嘅視線受貨物所阻，加上行駛期間左搖右擺，貨物搖搖欲墜，好似通街走嘅公路炸彈咁，隨時引發車禍，唔怪得其他車輛避之則吉喇。

即係咁，泥鯭的本來已經違法，加上嚴重超載，更係危危乎，唔止威脅路面安全，仲嚴重影響居民日常生活添。呢，本報記者去上水一個的士站睇過，每日下午兩點到六點，都會有三、四十個水貨客攞住大包細包等的士，好多司機見有利可圖，索性冚旗拒載，淨係做水貨客生意，而且明碼實價，以遠遠高於正常車費嘅價錢釣泥鯭，搞到居民望車興嘆，怨聲載道。

話時話，呢啲亂象唔係一朝一夕，亦唔係個別現象，唔通當局咁都睇唔到？警方話喎，由舊年十月到今年九月，共有十個司機因為超載而被檢控。唔使問阿貴，執法部門擺明係敷衍了事，根本冇認真執法，警方只要派人去上水睇吓，可能一日都唔止十個司機超載喇。正如有立法會議員話齋，近期已收到唔少投訴，連公共交通工具都受水貨客困擾，當局應該正視問題。

老實講吖，如果當局肯正視問題，水貨就唔會搞到七國咁亂，成為激化中港矛盾嘅導火線喇。正所謂，道高一尺，魔高一丈，水貨集團不斷變招，以前多數走奶粉，家陣乜貨都走，以前多數利用東鐵，家陣連泥鯭的都利用埋，而當局居然隻眼開隻眼閉，你話係咪離譜吖。世不患無法，而患無必行之法。佔領行動堵塞道路，無法無天，當局投鼠忌器，唔敢執法，點知依家連打擊泥鯭的走水貨都懶懶閒，簡直匪夷所思，唔怪得有人話香港法治已死喇。咪話太一叮唔提醒吖，當局放任泥鯭的走水貨，等於放任公路炸彈通街走，遲早出事嘅咋，叮！