大學近日接力舉行學位頒授典禮,尋日輪到香港城市大學,分別頒授榮譽理學、社會科學、工商管理學博士榮銜予發明「雞尾酒療法」的艾倫戴蒙愛滋研究中心科學主任何大一(David)、中策集團主席兼行政總裁柯清輝、裕華集團主席余國春。民政事務局前常秘「媽打」李麗娟都有現身呢個場合,原來佢同David相識多年,所以要來捧場喎!媽打話,二○○○年有中港兩地青年團體在北京合辦龍舞長城賀千禧活動,佢就係當年在北京認識何大一,後來何大一成立中國愛滋病防治行動後,仲搵咗佢同港大校務委員會主席梁智鴻幫手做該行動嘅香港委員會成員,自此大家便經常來往。

何大一(左)同李麗娟相識咗十幾年,老友到極。

余國春(前右三)獲陳有慶(前右二)等一眾好友到場祝賀。

張德熙(右)與太太都係城大商學院教授黎建強學生。

張德熙讀「直通車」課程

媽打形容,David嚟到香港就好似佢屋企人咁,有時佢去紐約,David都會好照顧佢,所以換轉對方嚟香港,佢當然要一盡地主之誼。

金銀業貿易場理事長張德熙都有出席,但佢並唔係嚟攞榮譽博士,而係佢花咗四年時間,剛完成工商管理碩士及博士兩個學位課程。

張德熙話本來係佢太太伍翠瑤想讀先,後來經太太介紹下認識咗城大商學院教授黎建強,問佢點解唔讀番個博士學位,而當時佢仲未有碩士學位,所以黎教授就推薦佢讀「直通車」課程,一連讀晒兩個學位之餘,仲教佢點樣揀科可以最快讀完,原先六年嘅課程,張德熙只係用咗四年就完成咗,足足慳咗兩年時間。

另一邊廂,柯清輝及余國春都有好多親友嚟捧場。幾十個好友包括亞洲金融集團主席陳有慶及潮州商會常董葉振南等,齊齊圍住余國春,爭住同佢影相,又送上寫有「工商翹楚.管理精英」嘅墨寶賀佢。

第一手消息請下載on.cc東網iPhone/iPad/Android/Windows Phone Apps