政壇：搞搞政：冤家點名狙擊 陳茂波有排頭痕
官員同議員，本來就有監督工作嘅衝突，但泛民主派議員宣布發動全面不合作運動後，一眾高官嘅日子似乎更難捱，如果雙方喺新仇之前仲有舊恨就更精彩喇，發展局局長陳茂波就係咁，會計界議員梁繼昌（Kenneth）早前順利輪任財務委員會轄下人事編制小組委員會主席，「水鬼升城隍」，點名要狙擊陳茂波（Paul）同政制及內地事務局局長譚志源（Raymond）呢兩口「眼中釘」，唔使問，兩者中又以阿Paul係焦點中嘅焦點。
設計圖片及對白
據知，Kenneth同阿Paul牙齒印唔少，由前年立法會選舉起，Kenneth出戰，同佢打對台競逐會計界議席嘅林智遠（Nelson）就係由Paul親自「抬轎」，Kenneth要經歷一場硬仗先以千票之差擊敗對手。此外，阿Paul加入政府後接連爆出劏房風波、囤地疑雲等負面新聞，泛民狙擊不停，唔差在Kenneth多一腳喇。
不過，Kenneth狙擊官員嘅如意算盤恐怕未必打得響，首先人事編制小組在今個財政年度本來就冇咩具爭議性嘅職位開位申請，真正「戰場」始終留番喺工務小組委員會，而建制派早就放風話，根本唔介意拱手相讓人事編制小組主席畀泛民議員揸fit，所以都唔係好着緊係咪補派人加入委員會。所以Kenneth想留難官員，可能爆咗自己心事，仲未必有機會。
