政壇：卿姐話學生唔識尊重人

大學生踴躍表達個人政治意見值得尊重，但有啲大學生嘅表現缺乏質素及個人涵養，同樣應該批評。早前商務及經濟發展局前局長馬時亨（肥亨）出席一間大學畢業禮，致辭時因為講咗啲學生唔啱聽嘅說話，台下有學生隨即報以噓聲，打斷講話。呢件事引起名氣圈人士關注，肥亨亦即時反擊呢啲學生應該尊重及保障佢嘅發言權。白鴿黨立法會議員劉慧卿日前同肥亨食晏，大家都講起呢件事。

卿姐覺得，啲學生成日將民主掛在嘴邊，但就唔畀人持相反意見，有咩唔啱聽就噓人、唔畀人講落去，呢種行為根本一啲都唔民主，佢批評：「咩係民主啫？就係講求多元，接納唔同意見嘛！」唔講唔知，當日肥亨講嘅題目正係關於「尊重」，但啲學生聽人講尊重，竟然反尊重而行，難怪卿姐都睇唔過眼，直言一諗到呢嘅咁霸道嘅場面，佢自己都膽戰心驚，亦唔希望大學教出嘅學生會係咁喎。

其實，卿姐喺佔領行動後，都唔止一次試過喺佔領區遇到啲唔禮貌嘅對待，或者係咁，佢對何謂民主內涵同民主質素更加緊張啩。