政壇：田二少 山長水遠食牛腩
立法會議員田北辰（田二少）嘅選區位於新界西，但佢尋日就現身新界東大埔區，究竟所為何事呢？原來佢山長水遠入大埔，就係為咗滿足小小嘅口腹之欲，一嘗該區著名嘅清湯腩！
招牌清湯腩落肚，田二少心情更輕鬆。
田二少同友人排隊半個鐘先可以入座。
尋日下午一時左右，一身西裝嘅田二少在大埔大明里出現，連同兩名男友人在一間清湯腩小店門外排隊等位。呢間小店都幾受歡迎，中午時分已經大排長龍，加上不設訂位，田二少一行三人都等咗大約半個鐘先可以入座。
坐低冇耐，田二少就柯打該店嘅招牌爽腩河及清湯腩，睇嚟佢之前都做足功課！用餐期間，有人走入店內同田二少握手，田二少亦表現親民，不時同隔籬枱女士傾偈。唔知平時食開好嘢嘅田二少，覺得今次專登排隊食平民小店水準如何呢？
