政壇：楊立門 幫過陳百強作歌
民政事務局前常任秘書長「AO歌王」楊立門，當年曾經想做歌星，其後卻去咗做官。楊立門尋日出席「協青社青年進修助學計劃」活動，同一班年輕人分享當年追夢經驗。原來當年佢除咗參加過新秀歌唱大賽外，仲參加過流行曲創作大賽，陳百強嘅《別話》就係其作品。不過，佢覺得自己創作嘅歌由別人演繹，始終差咁啲嘢，所以佢會在明年三月嘅慈善演唱會上，親身演繹一次畀大家聽。
楊立門（左）當年曾經幫過陳百強創作歌曲《別話》。
楊立門仲透露，當年之所以放棄新秀歌唱大賽，有個重要因素係佢揀咗首武俠片主題曲，點知監製「強烈要求」佢穿上古裝一邊揮劍一邊唱，佢覺得堂堂一個大學生，咁做唔係佢風格，加上當時被政府取錄做政務官並唔簡單，所以覺得係時候搵份好工回饋父母。不過，現在事隔多年，依然有唔少人想聽佢唱歌，佢就希望再拾興趣，趁仲唱得就唱，至於會唔會學埋跳舞，佢就話依家筋骨硬咗想跳都唔得喇。
