政壇：泛民建制嗌交當議事
泛民主派立法會議員發動不合作運動突襲工務小組委員會，令小組泛民人數力壓建制派。建制派為補鑊紛紛申請逾期加入小組。小組委員會尋日召開特別會議討論十二位建制派議員嘅逾期加入申請，兩邊陣營好似小學雞咁爭拗咗兩小時，白鴿黨單仲偕同建制派嘅鍾樹根等更隔空拳來拳往，最後連十二個申請係合併處理定分開處理都未決定到，要再開過會，耗時兼費人力，仲要嘥晒納稅人血汗錢，尊貴議員真係嗌交當議事噃。
設計圖片
尋日工務小組委員會開會，泛民中人批評建制派依家咩都霸住晒，好過分、混帳，單仲偕更擺明點火，批評建制派將未有如期加入小組嘅責任卸畀助理，更加叫建制派考慮公開道歉，話「你哋痛改前非、樹立榜樣，應該會有幫助。」
建制派即刻反擊，譚耀宗不滿泛民一朝有權就即刻弄權︰「如果再緊要啲可能要我哋跪晒喺度，喺度喊晒口，要求畀個機會痛改前非，係咪咁樣呢……需唔需要搬測謊機嚟去測謊呢……第日你做特首我哋慘囉，全部殺頭都有份囉！」蔣麗芸亦接口，向泛民中人曉以大義：「做大事嘅人，丞相肚裏可撐船」，叫泛民做事，唔好斤斤計較咁話。
鍾樹根狂辣火頭
不過，最辣火頭嘅係鍾樹根，佢挑戰呢個小組主席梁家傑嘅做法，激到對方紮紮跳。樹根話，議員申請加入小組嘅理由好充分，主席係有酌情權，又話「如果咁遵守法例，就唔應該有佔中啦！」仲同袋巾傑講︰「你做唔做自己決定，係咪偽君子你自己決定！」激到袋巾傑即時宣布暫停會議，叫樹根睇清楚小組嘅會議程序邊度有寫主席有酌情權。
另外，議事規則委員會尋日開會，同意在事務委員會延長會議期間允許議員提修訂動議，稍後會將建議提交到立法會大會。但關於剪布同點算人數問題，大家就仲未有共識喇。
