一人捐軀救五命 無私大愛暖人間
「雖然冇咗一個兒子，卻多咗五個新兒女」。太一叮講緊嘅係一宗捐軀救人、遺愛人間嘅感人故事，喺社會因佔中而嚴重撕裂嘅今時今日，呢個故事令人感覺世間仲有溫暖，香港仲有希望。
本報曾經報道，今年廿二歲嘅梁家維患有心室擴張繼而導致心衰竭，三個月前病發入院，之後一直靠儀器維持心臟泵血續命，等待有心人捐贈心臟，而院方鑑於家維病情嚴重，將佢排喺輪候名單第一位。可惜吖，佢等唔切移植，已經喺本月初被病魔帶走。家維生前嘅志願係成為一位測量師，即使病重入院，仍從未輕言放棄，佢壯志未酬就咁走咗，實在令人惋惜，而梁家痛失獨生子，心情嘅悲痛更加係可想而知。
就喺呢個時候，家維父母做咗一個非常艱難又非常偉大嘅決定，就係將家維有用嘅器官，包括肝臟、腎臟同眼角膜捐出嚟，結果成功拯救五位病人。家維父母話，因為唔想其他等緊器官移植病人嘅家屬重複佢哋嘅無奈同傷痛，所以捐出囝囝器官，呢番話實在令人動容。正所謂，救人一命勝造七級浮屠，家維父母一念間嘅決定，改變咗五個家庭嘅命運，實在係功德無量。
老實講，好似家維父母咁偉大嘅人，社會上真係多多益善，事關家陣仲有好多等緊心臟移植救命嘅病人，但今年只有七名病人成功換心。至於其他末期器官衰竭，等候換心、肝、肺、腎同骨髓嘅病人，更加有超過二千人，以腎臟移植為例，病人平均要等五至十年，最長輪候時間甚至去到廿七年，唔少病人等唔到而病逝唔在講，即使有幸等到嘅，好多都因為病情轉壞，甚至出現併發症，冇辦法進行移植。
冇錯，中國人傳統觀念係人身後要留全屍，但今時今日時代進步，呢個觀念早就out啦。喺好多地方，捐贈器官已經唔係咩禁忌，新加坡、法國等地直頭實行「默認捐贈」模式，即係政府假設所有民眾死後都同意捐出器官，唔同意嘅要以書面形式提出。而同香港一樣採取「自願捐贈」模式嘅地方，好似加拿大咁，市民簽署捐贈卡反應相當踴躍，比例超過兩成，反觀香港只得個位數，就因為咁樣，好多病人失去生存機會。
點講都好，香港係國際大都會，經濟成就不輸人，為善積德捐贈器官又點可以執輸呢，係咪？
