政壇：搞搞政：佔領堵路錢果豐賺到笑
受到佔領行動嘅影響，市民同商戶叫苦連天，可以話全民皆輸。但要數最大嘅得益者，一定非港鐵主席錢果豐莫屬。咪就係拜佔領封路，令港九多處交通受阻，市民紛紛改搭港鐵所賜囉，港鐵賺到笑之餘，市民嘅焦點集中喺佔領行動嘅進展，蓋過咗對高鐵工程延誤、超支等紕漏，錢果豐仲唔偷笑？
設計圖片及對白
港鐵早前公布，自「九二八」佔領行動開始以來，每日平均客量升幅達一成二，當中港島線等三條傳統路線最熱鬧，繁忙時間班次接近飽和，加無可加。單係十月三日當天，已錄得五百八十萬客量，多出七十萬人次，真係收錢收到手軟。
蓋過高鐵延誤超支醜聞
老實講，港鐵多項鐵路工程連環爆出延誤超支醜聞，佔領前已令全城嘩然，其中淨係高鐵香港段工程就超支六十五億元，令總工程開支飆升至逾七百一十五億元。上月底，港鐵獨立董事委員會公布高鐵香港段工程延誤第二份調查報告，講到明高鐵有機會無法喺一七年通車，同埋工程費可能進一步超支。照計報告出爐後，應該全城鬧爆，之但係報告公布當日撞正佔領行動「滿月」，新聞焦點輕易畀佔領轉移，錢果豐又一次成功避過火頭。
其實運輸及房屋局局長張炳良都應該感謝佔領搞手，事關除咗多項鐵路一再延誤，連國家級重點工程港珠澳大橋都爆大鑊，張炳日前都焗住認衰，披露大橋香港口岸將超支高達五十億元，可謂屋漏偏逢連夜雨。如果係以前，張炳實畀班議員鬧爆，但學聯最近計劃北上，向中央表達政改嘅進展，又成功蓋過部分焦點。若果問有冇人唔想佔領行動快啲結束，恐怕錢果豐同張炳會舉手囉！
