隨住菲律賓政府半年前致歉賠償後，受馬尼拉人質事件困擾多年嘅受害者家屬，生活已慢慢恢復寧靜。尋日殉職領隊Masa謝廷駿嘅媽媽李美珍以糖尿病患者身份出席一個健步日活動，我哋見佢笑容滿面，原來Masa細佬謝志恒八月添男丁，Masa媽媽沉醉於湊孫樂，不過佢就呻，孫仔出世後，佢成日食薑醋，搞到個人肥咗之餘，血糖更升到八度，超晒標。

謝廷駿媽媽（左二）因孫仔出世而食多咗薑醋，導致血糖爆晒燈。

尋日個活動就宣傳病人要定時篤手指，記錄餐前餐後血糖水平，要檢查糖化血紅素（HbAlc）水平，先可以有效控制糖尿，但謝媽媽聽完，反問乜嘢係HbAlc，又調皮咁賴醫生冇解釋畀佢聽喎！睇嚟謝媽媽要做多啲運動，食少啲高糖高脂食物，咁先可以健康陪個孫仔玩喇！

第一手消息請下載on.cc東網iPhone/iPad/Android/Windows Phone Apps