政壇：富貴黨出招或放生兩堆

全國政協常委會喺上月以二百六十七票贊成、兩票反對、三票棄權，高票通過褫奪田少長達十六年的全國政協委員資格，被外界認為中央係想殺一儆百。之但係江山易改，本性難移，立法會喺上星期四討論係咪引用《立法會（權力及特權）條例》調查CY收受澳洲UGL公司四百萬英鎊嘅事件時，由田少所領導嘅富貴黨成員非但無好似其他建制派咁樣投下反對票，亦無離席拒絕表態，而係坐定定喺度投棄權票。

鍾國斌指無意放生

及至上星期五財委會上，田少亦講到明會反對「三堆」撥款申請，但就支持石鼓洲焚化爐撥款申請。有建制派私下耳語，由於富貴黨同泛民主派加埋有成三十二人，如果佢哋三個堆填區都投反對票，只會令一個堆填區都過唔到，所以佢哋打算喺屯門同打鼓嶺堆填區投票時刻意唔到場，令泛民唔夠反對票否決撥款之餘，亦唔使怕會再得罪中央同選民。

富貴黨副主席Felix鍾國斌接受查詢時，再度表明反對三個堆填區撥款申請，亦無計劃放生三個堆填區。Felix話，雖然佢哋一定唔會離席唔投票，但由於佢同方剛喺未來兩個星期五都會相繼唔喺香港，如果財委會突然之間唔拉布可以投票，佢哋就無得坐喺度投反對票喎。