千瘡百孔降橫禍 郵政醜聞特別多
俗語話，衰開有條路，唔到你唔信o架。呢，管理混亂，醜聞多多嘅香港郵政，唔止「失信」於人，連內部都千瘡百孔，危機四伏，幾乎搞出人命，簡直靠害。
係咁嘅，位於葵涌麗瑤邨嘅香港郵政特快專遞運作中心，日前上演一齣「奪命驚魂錄」，兩塊石屎連鋼筋突然從天而降，其中一塊超過半米乘半米，另一塊直徑亦有三十厘米，好彩員工走避及時，僅受輕傷，否則後果不堪設想。咪以為冧天花係小事吖，如果大吉利是中咗「頭獎」，分分鐘搞出人命都似。
話時話，香港郵政管理混亂，烏龍百出，類似驚險事件已經唔係第一次嘅喇。紅磡國際郵件中心三年前亦發生天花剝落事故，員工雖然逃過一劫，但已抹咗一額汗。一不離二，二不離三，香港郵政又唔保養又唔維修，搞到陷阱處處，唔怪得有員工認為自己係喺危樓做嘢。咁搞法，唔通真係要員工戴頭盔開工？
香港郵政又點樣回應吖？發言人承認有咁嘅事，話事後已經封鎖有關地方，並且通知咗業主房屋署跟進喎。喂，咁擺明係卸膊啫，自己嘅工作場所出事，點可以推畀業主就算數o架。正如有立法會議員話齋，香港郵政作為僱主，未有為僱員提供安全嘅工作環境，事後仲將責任推畀房署，有嚴重失職之嫌。冇錯嘞，香港郵政唔止失職，直頭失德添吖！
講開失職兼失德，香港郵政惡意滋擾東方報業集團，唔止違法拆開郵件，而且延誤郵遞，就係典型例子喇。成件事匪夷所思，疑點重重，如果話唔係刻意針對正義傳媒，唔係政治打壓，細路仔都唔信喇。嗱，香港郵政嘅所作所為唔止違反《郵政署條例》，亦涉及干犯刑事罪行及干犯《個人私隱保障條例》，由於性質嚴重，引起公眾廣泛關注，東方報業繼日前報警處理後，昨日亦已向私隱專員公署投訴，要求徹底調查，追究責任。
正所謂，上枉下曲，上亂下逆。政府部門輪流打壓東方報業，早就唔係新聞，估唔到連香港郵政亦充當打手，簡直令人嘆為觀止。今時今日，香港正值多事之秋，佔領鬧劇沒完沒了，港府束手無策，施政癱瘓，仲跛過跛腳鴨，港產官僚自身難保，仲要倒行逆施，以卑鄙手段滋擾正義傳媒，打壓新聞自由，你話係咪自取滅亡吖。香港烏煙瘴氣，妖孽為患，唔通真係氣數已盡？
