潮語「炒散」唔好誤會同投資炒賣有關,如果有人「炒散」可以撈到「炒樓」就另作別論。「炒散」嘅意思即係撈散工咁解,「散工」當然即係臨時工作,以客串形式返工。「炒散」可以係一份兼職,又可以係一份Project,總之唔係長工,冇福利、冇MPF兼出糧冇定時。

香港地有錢人何其多?有錢人家財雄勢大,隨時炒吓炒吓分分鐘一千幾百萬上落,轉吓眼就賺大錢,魚翅撈飯都係濕濕碎。但另一邊廂,香港又有一班活喺貧窮線以下嘅人,月入少過萬四蚊之餘,日日撈份清潔工、執罐執紙皮搵搵埋埋都唔夠錢喺茶記食碟揚州炒飯。香港貧富懸殊嘅情況舉世聞名,亦從堅尼系數可以睇到。真係有人炒樓炒股炒到風生水起,有人糧無隔宿仲要畀人話唔抵可憐。不過最可憐嘅係,香港嘅政治現實同制度,係完全偏向有錢人,當初《基本法》草擬嘅時候,最大嘅目的都係想啲有錢人唔好帶埋啲錢走,所以唔知係咪因為咁,特首就不嬲由一班權貴小圈子選出。有一男子話,如果香港有真普選,選出嚟嘅人係會將香港變成福利主義社會,所以一定要有一個由小圈子組成嘅提名委員會,或應經過篩選然後再選,減低呢個風險。查實真普選會否令香港變成福利主義社會真係不得而知,但係人人平等呢種普世價值,留學英國嘅一男子冇理由唔知!唔通當年留學英國嘅佢,日日掛住「炒散」搵錢而唔係讀書?

廣告或娛樂界都好多人係長年累月「炒散」,例如一啲做燈光、做收音嘅,通常都係長期「炒散」,又或者一啲設計人員,長期做啲短期工作「炒散」,佢哋美其名會叫自己做「Freelancer」。實際,即係啲收入唔穩定嘅三更窮五更富嘅「老散」。有啲公司例如做清潔或政府食環署外判工,經常請人「炒散」,因為咁樣可以慳番啲強積金同員工福利,講到底都係剝削窮人。不過喺香港地,有大把窮人連自己被人剝削緊都唔知,仲掉番轉頭幫權貴講好說話。有人想改變個制度幫佢哋,仲要畀人鬧番轉頭。呢啲係咩人?咪就係一男子啲Fans!

第一手消息請下載on.cc東網iPhone/iPad/Android/Windows Phone Apps