政壇：袁彌明做「亂世佳人」
佔領行動收唔到尾，一度喺佔領區活躍嘅人民力量主席袁彌明（Erica），卻被發現另有人生大事，事關佢同未婚夫、網站CEO林雨陽被發現喺婚姻登記處排期結婚，婚姻登記處循例公告登記人嘅名，我哋直接向Erica求證，佢大方證實，雖然佢話一切從簡，但從佢透露嘅各種安排，呢個準新娘睇怕有排忙囉。
袁彌明（左）同林雨陽早在幾個月前已公布婚訊，結果婚姻大事唔受佔領行動影響。（資料圖片）
袁彌明同林雨陽喺婚姻登記處註冊結婚。
Erica尋日接受電話訪問時，大方承認的確係佢同林雨陽去登記結婚，二人將於下月二十七日註冊結婚及擺酒宴客，婚期未至，但早前佢哋已經赴法國旅行，預支蜜月。Erica話：「喺法國順便影咗啲相，雖然無着婚紗，但都當係婚紗相o架喇。」
至於婚禮會否好隆重？佢透露計劃擺十幾圍，「想一切從簡同低調。」咁婚後會唔會立即造人，同埋繼續工作呢？佢就話已有安排：「同以前一樣，無改變，都係做番以前嘅嘢！」而且，佢同未婚夫有共識，暫時未計劃生育，又或者唔生啦！睇嚟佢哋有排二人世界。
