被視為投資銀行界實力派嘅胡祖六最近有新動向,港交所尋日公布,委任胡祖六博士做獨立非執行董事,接替早前突然中途辭職嘅施德論,下周一(10日)即生效。由於今次係填補施德論辭任後嘅臨時空缺,依例胡祖六將喺下一次(即明年四月)嘅股東大會上退任,故只有5個月任期,但佢有資格再獲委任。換言之,明年佢要再由股東選舉,至可以繼續再玩。

不過,胡祖六喺金融界可謂無人不識,係高盛集團前大中華地區主席及董事總經理,現任清華大學中國經濟研究中心教授兼聯席主任。以胡祖六嘅知名度、喺金融界嘅江湖地位,斷估都好大機會選到。佢做港交所獨董,每年可收取70萬元酬金。

政府委任董事方面,明年許照中同利子厚夠六年任期,按例要退任。可以預期,明年港交所董事局將會有不少新面孔加入。

港交所曾經被批評,董事中有不少人係外資大行鬼佬,依家多啲中國人,應該冇人反對!

第一手消息請下載on.cc東網iPhone/iPad/Android/Windows Phone Apps