立法會頻傳喜訊,繼勞工界立法會議員郭偉強已定於明年二月、農曆新年前同拍拖多年嘅女友結婚,漁農界議員何俊賢(高佬賢)尋日更搶閘派喜帖,宣布今個月就同拍拖三年嘅女友Elaine結婚,榮升老襯告別單身一族。

高佬賢(右)去主席房派帖畀曾鈺成(左)時,畀對方笑佢「懶神秘」。

高佬賢透露,女友做社工,兩人在三年前嘅一場義工活動上相識,佢在今年初向女友求婚,暑假休會時更加去咗北京萬里長城影婚紗相,認真密實。雖然兩人已經訂咗本月三十號喺元朗一間酒樓擺三十幾圍,宴請親朋好友,但由於兩人性格低調,高佬賢早兩日先開始派帖,仲有唔少親友未被知會。

高佬賢尋日準備咗一疊喜帖派畀其他立法會議員,佢話當自己在內部黨團會議上派帖時,鍾樹根反問佢:「乜你仲未結婚o架咩?」雖然主席譚耀宗都有恭喜佢,但就同時望向仲未結婚嘅陳克勤話:「依家好似得番你一個(未結婚)咋喎!」而高佬賢向主席曾鈺成派帖時,就更加被笑「懶神秘」。

第一手消息請下載on.cc東網iPhone/iPad/Android/Windows Phone Apps