政壇：鍾志平風騷領工業家獎
香港工業總會早前舉行年度傑出工業家及青年工業家頒獎禮，前工總主席兼「電鑽大王」鍾志平（Roy）獲頒傑出工業家獎，另有七位青年工業家誕生，包括全球最大手套生產商昌利行董事總經理林曉盈、創隆實業總經理陳偉等人。頒獎晚宴上，政商界及工業界老中青齊聚，阿Roy場中表現好風騷，拎住獎座周圍走，仲講笑話驚唔見喎！抱病主持頒獎禮的工總主席劉展灝就盛讚阿Roy當年隻身由澳門來港創業，係典型白手興家的成功例子，值得工業界借鏡。
鍾志平（中）獲傑出工業家殊榮，劉展灝（右）及鄭國漢（左）都戥佢開心。
呢晚浸會大學校長陳新滋、嶺南大學校長鄭國漢及科技大學校長陳繁昌亦有到場，佔領行動仲未落幕，唔知佢哋所屬嘅大學仲有幾多學生仍然罷課參加佔領行動呢？鄭國漢話，唔肯返學的嶺大學生「兩隻手數得晒」，陳新滋就話浸大仲有約三十位同學未返學。不過，陳繁昌就笑笑口話，科大好少同學罷課喎！
俊和發展主席彭一庭都有現身，早前俊和高調去信多間大學取消資助獎學金，以示對學者及學生領袖參與佔領行動的不滿，事件一度引起熱議。不過，當晚佢笑笑口封嘴，話屋企人已有共識，唔再就件事發言喎！
