政壇：陳恒鑌善事都申報
近年市面多咗好多家庭電器，麵包機、雪糕機，真正眼花繚亂，身兼新界潮人總會會董嘅立法會議員陳恒鑌（Ben）最近就收到份禮，事關潮人總會贈送二十六個電燉鍋同三十部蒸蛋器，總值一萬一千二百元畀佢，阿Ben話，呢批電燉鍋同蒸蛋器係其中一位會董在上個月初捐出，將會透過佢嘅各區辦事處送贈畀有需要嘅長者。
雖然係咁，阿Ben日前都要循例向立法會申報，喺上個月十一日收到合共五十六個、每部價值二百元嘅電燉鍋同蒸蛋器，做到呢步，避免畀人抽秤都好嘅。
據講，潮人總會有位會董開設小型家庭電器廠，總會主席周厚澄就向呢名會董「揼心口」，問可唔可以捐啲電器畀長者，呢位會董最後亦冇托手（月爭）。阿Ben聽見就嗱嗱聲向總會申請，攞咗呢批電燉鍋同蒸蛋器，託地區同事派畀區內有需要嘅長者。不過，電燉鍋同蒸蛋器呢啲咁新潮嘅家電，未必個個長者都識用，唔知阿Ben啲同事有冇教埋啲長者點用呢？
