政壇：泛民講親總辭騰騰震
泛民政黨最近如熱鍋上嘅螞蟻，佔領嘅人要佢哋總辭，但民主黨（白鴿黨）同公民黨（公文袋）卻一直龜縮。據悉，泛民近日曾就佔領行動做民調，提問內容除咗關於立法會議員辭職，搞變相公投外，仲問埋市民對補選嘅投票意向，點知民調結果係泛民支持度插水，下跌幾多﹖邊啲選民流失﹖結果一樣被隱形，唔敢公布。呢個或者係公文袋梁家傑同白鴿黨何俊仁講親「總辭」就騰騰震嘅原因啩。
設計圖片及對白
其實，呢兩個泛民大黨早前已被人踢爆，靜雞雞就佔領行動及政府對佔領行動嘅處理手法做民意調查，結果又懷疑係唔啱聽，只好按下不公開，難為接受佢哋訪問嘅市民，無端端被人滅聲。估唔到，事隔約一個月，泛民陣營又身痕。
據了解，呢次嘅民調內容包括佔領人士係咪應該退場、泛民議員應否發動辭職變相公投、泛民辭職後補選，市民會投畀泛民定建制派等。調查內容全部係近期熱爆嘅焦點，作為負責任嘅政黨，好應該有交代、有誠信咁公布，點知民調結果麻麻。消息指，民調顯示，認為佔領人士應退場嘅市民有所增加，而市民對補選嘅投票意向，更加有大變動，過往泛民對建制派嘅得票比率接近六四比，但今次就顯示雙方距離拉近到五五波，一句講晒，準備投票畀泛民嘅選民又再大範圍流失囉。
辯稱民調問題難追形勢
由於民調再次顯示泛民支持度下跌，泛民只好再為民調「滅聲」，近日講親辭職公投都扭扭擰擰，亦同佢哋掌握嘅民意走向有關。我哋就問過公文袋同白鴿黨中人，佢哋就唔認有做過新一輪民調，仲話依家形勢轉得咁快，都擔心寫完啲問題，到問嗰陣時已經不合時宜喎。兩黨唔認數，咁調查會係乜嘢人做呢﹖問得應否辭職公投、同票投誰黨嘅，大家都好易鎖定目標喇，只係以滅聲對付異議，手段都認真肉酸。
