城中鏡：阿里光棍節勢創銷售紀錄
由馬雲揸fit嘅阿里巴巴喺舊年「光棍節」嘅銷售額，達到三百五十億元人仔，震驚中外。今年十一月十一日又玩過喇，阿里上個月完成美國上市，今年嘅網購節更有走向國際嘅意義，阿里一邊加強與國際品牌合作，拓展內地市場嘅同時，亦首次將香港、台灣同俄羅斯等海外地區作為重點市場。既然國際化咗，超越舊年銷售金額應該唔難，但應該去唔到舊年八成嘅增幅。
馬雲揸fit嘅阿里巴巴喺舊年「光棍節」嘅銷售額震驚中外。
「光棍節」又名「雙十一」網購節，經幾年發展，「雙十一」已成為外界關注內地消費市道嘅重要指標之一，阿里齋計旗下嘅天貓，已經話咗有二萬七千商戶，參與今年嘅促銷活動，當中包括GAP、ZARA，甚至大家估唔到嘅新奇士橙、用產地直送為焦點嘅波士頓龍蝦，個別品牌仲話要將部分生產線，專注於「雙十一」促銷品嘅生產，擺到明要食盡呢個黃金機會。
「雙十一」唔只係網購商機，就成互聯網金融產品促銷法門。有消息指出，阿里關聯嘅螞蟻金服將於短期內，同阿里合作推出一款名為「天貓寶」嘅理財產品，這項產品除向客戶提供等同「餘額寶」收益外，亦會提供每年約百分之一嘅天貓消費補貼，使客戶在以「餘額寶」作小額理財同時，亦吸引其將資金在天貓銷售，可謂是一石二鳥嘅促銷手段！
阿里對手騰訊持股嘅京東，面對天貓早前開展「雙十一」家電產品預售試圖提早綁定消費者，京東提早喺十一月一日至十二日開展本年網購促銷外，亦會喺「雙十一」當天投放大量與天貓預售價格相當嘅家電產品，實行以貨真價實嘅手段，向對手還擊。
