SUN搞作：打橫嚟講：獅子頭上釘Banner

一條巨型黃色直幡，只須五隻字「我要真普選」，就令全個香港所有本地人振奮起來，高呼「獅子山精神」返來了！

獅子山精神，在回歸後，逐漸被蛀食，至消失得無影無蹤；甚麼刻苦耐勞、守望相助、堅忍無私、我為人人……等，再不只是離地空談，更係讓人發笑的偽語！

急功短視、埋堆獻媚、摒棄公義、縱容暴政，換來的，咪係等多班車、上唔到樓、醫院無床位、麵包十二蚊個、年輕人無出路囉……但那些大財團的珠寶店卻愈開愈大間、無藥材的藥舖總有間喺你左右，而面目可憎的廢柴庸官，愈無能反智加喪心病狂的愈坐愈高位，咁違反天理的荒謬事，乜嘢獅子山精神都頂唔住啦！

獅子山精神最可貴之處，就係即使我哋窮、社會物資匱乏，只要大家肯捱，同舟共濟，將來，呢度一定好的！這便是重點：有希望！

今天的香港，何止無希望，直情係「絕望」。

香港廢柴政府無認受性、政策混亂，官員質素超低，除倒行逆施，唔衰唔做之外，還偏幫權貴、聽命西環、攪亂香港，咁樣，我哋真心愛港的本地人，仲邊有運行呢？

當全港市民懷念獅子山精神的時候，即是明顯地不滿家吓呢個一籃子賤骨頭政府高層囉！

山不在高，有仙則靈。

香港的獅子山在中華大地上算是個矮仔，但它的靈氣，足可以傲視五嶽，俯瞰神州，一切牛鬼蛇神，盡現眼底，不過，它的神力，全要歸功於有一道五字黃符，並需要開光實踐至得！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府