早前立法會討論警方應對佔中手法，議員梁志祥話睇過黃飛鴻電影嘅人都知雨傘係攻擊性武器，仲話細個已經聽長輩講，出入要帶雨傘防身，必要時可以用嚟打狗添！結果呢番言論惹來愛狗人士不悅，聽聞有人沉唔住氣向愛護動物協會投訴佢有虐畜之嫌。

設計圖片及對白

聽聞有唔少網民不滿梁志祥公開話用雨傘打狗，有教唆市民有樣學樣、用雨傘虐畜之嫌，於是紛紛留言聲討，搞到梁志祥幾頭痕。梁志祥為其言論再解畫話，雨傘遠至元朝已經用作武器，只係黃飛鴻家傳戶曉先以佢為例，容易引起共鳴咁話。對於被指虐畜，梁志祥自言公開發表言論，大眾自有公論，但協會至今仍未正式出信投訴，唔知係咪證據不足呢？

阿Ben撐國教 女兒逼轉校

除咗梁志祥禍從口出，其黨友Ben陳恒鑌亦自爆，前年因為支持推行德育及國民教育科而差啲影響女兒學業前途。阿Ben透露，前年參選立法會選舉時正值女兒入讀幼稚園，女兒喺佢耳濡目染下，喺校內亦撐國教以支持爸爸。咁啱當時阿Ben公開發表撐國教言論而惹起爭議，有一日佢湊女返學校時，幼稚園校長竟兜口兜面同佢講，唔認同佢嘅言論，令佢非常震驚。

阿Ben認為學校地方本應政治中立，即使校長唔認同家長嘅政見都唔應該講到出口，校長此言一出令佢擔心女兒喺學校會受到不公平對待，所以下年就幫女兒申請轉校，轉去一間不問政治立場嘅幼稚園，畀寶貝女喺安靜嘅環境長大。其實立法會議員藉「破格」言論增加曝光率唔係新鮮事，但梁志祥同阿Ben輪流禍從口出，真係唔知算唔算得不償失喇！

第一手消息請下載on.cc東網iPhone/iPad/Android/Windows Phone Apps