政壇：佔中大殺傷力武器網上瘋傳
佔中發生咗成個月，呢個月以嚟，有唔少以訛傳訛嘅故事發生，有人聲稱自己屋企人因佔中塞車搞到失救，亦有人話發射催淚彈當日見到有警察射橡膠子彈，最終證實咗通通都係假。但似乎經過一個月訓練，好多人都未識分真假，尋日網上流傳話佔中分子儲存大量大殺傷力武器，仲言之鑿鑿話武器就係「一氧化二氫」，唔少反佔中人士都瘋傳，促警方嚴正執法。
呢張網上廣傳嘅圖，成為唔少人嘅歡樂泉源。（互聯網圖片）
其實一氧化二氫並唔係乜嘢大殺傷力武器，更加唔係化學武器，其實只係水嘅化學名稱「H2O」嘅中文譯名。雖然現時互聯網資訊發達，不過唔係太多人肯上網查證一下咩係「一氧化二氫」，一見到張圖就瘋狂流傳，有人仲話要警方立即派人到場銷毀所有「一氧化二氫」，結果呢幅圖成為網上熱話。不過反佔中陣營就批評呢張圖係由佔中人士製作，質疑佢哋製作呢啲假圖居心叵測。
無論係佔中又好，反佔中又好，其實亂咁傳一啲未經證實嘅消息，都好易惹起誤會。相信經過今次佔中，無論邊一個陣營嘅人，對分辨真假都會叻好多。
