政壇：蔣麗芸為「佔船」洗底
話說立法會議員阿Ann蔣麗芸今年二月農曆新年時乘搭歌斯達郵輪到越南下龍灣旅遊，結果演變成阿Ann口中嘅「不愉快抗議事件」，雖然事隔八個月，但阿Ann仍深深不忿，尋日趁立法會討論啟德郵輪碼頭最新發展時借題發揮，話當時「人哋高高興興咁上船，悲悲哀哀咁落船。」又話「唔止食物……簡直係世界上最差嘅，未試過食咁差嘅嘢，再加上船長態度簡直係……」。
設計圖片及對白
阿Ann年初乘搭郵輪去越南下龍灣，但因當地發生沉船事件以致郵輪未能泊岸，旅客掃興而回，郵輪返抵香港後，佢畀部分乘客推舉出嚟發聲，當日佢企喺郵輪甲板高呼發言嘅經典一幕至今仍叫人印象深刻。
促訂守則管經港郵輪
佢尋日話以佢咁嘅年紀，乘搭郵輪無數，依家先發現有好多經香港的郵輪都會「出事」，佢認為政府應研究制訂守則加強監管途經香港嘅郵輪，唔好畀郵輪公司話係意大利郵輪就嚇到鵪鶉咁，束手無策。佢仲話如果有守則，他日發生同類事件就算死都死得甘心。但佢就否認當日同其他郵輪旅客一起「佔船」，強調佢哋當日只係「抗議咋！」唔係佔領。
阿Ann一輪嘴講唔停，搞到委員會主席林健鋒亦要出聲叫佢留番少少時間畀旅遊事務專員容偉雄回應咁話。點知阿Ann仲理直氣壯咁話：「你（容偉雄）答我一條問題就得：有無守則、幾時改善、如何改善？」
容偉雄回答話同意郵輪服務水平好重要，政府同郵輪公司有聯繫，郵輪公司都知道香港旅客及內地旅客的特性，最後林健鋒亦氹番阿Ann，話希望有守則後下次佢搭郵輪時可以做個開心嘅乘客。
隔咗咁耐，睇嚟阿Ann仍然好介意「佔船」或「佔領」呢啲字眼，所以乘機幫自己「洗底」喇！
