「萬四」呢個潮語，同前政務司司長兼前立法會議員陳方安生「陳四萬」冇關。亦都唔係好似「慢四」咁，係一種舞步。「萬四」亦都有人寫成「14K」，即係一萬四千，不過「14K」會惹人誤會，同一啲激進組織拉上關係，都係寫番「萬四」穩陣啲。「萬四」嘅表面意思係一萬四千，呢「萬四」係意指閣下嘅家庭總收入。如果你嘅每月總收入只係得一萬四千或以下，恭喜你！你已被標籤為低收入家庭。

到底咩叫「獅子山下」精神？可能唔同年代有唔同嘅詮釋。喺上世紀六、七十年代，獅子山下係一大片未開發嘅九龍半島，漫山遍野都係木屋。以前嘅人為咗逃難，由中國大陸南移香港，好多就喺獅子山腳搭起木屋，安身立命。嗰個時代社會普遍貧窮，亦都冇九年免費教育。嗰一代嘅香港人，憑藉努力拚搏，有唔少能夠闖出一片天地。加上一九七一年麥理浩時代開始，香港經濟起飛，工商業發達，「獅子山下」精神，就係代表香港人努力堅毅，無論環境幾惡劣，都能團結一致實現理想，整整幾代人，用艱辛努力寫下那，不朽香港名句。當時嘅人雖然貧窮，但窮得有希望。可惜到咗今時今日，獅山依舊迄立不倒，但山下的人已經不再一樣。依家看看獅山腳下。唔少已經變成豪宅，但依然有唔少公屋，住緊好多收入唔夠「萬四」嘅人士。佢哋今時今日一樣係好努力工作，但係主權移交之後，政策只向內地人同大商家傾斜，「萬四」一族連希望都冇！

最近有政客話，所有「萬四」以下嘅人士，如果有真普選的話係會令到政府變成一個福利主義嘅政權。當然，亦要配合一個真正民主嘅制度，同埋，呢個都只係一男子嘅推測，不能作準。所以，「萬四」呢個說法一出，即成為一個潮語，用嚟形容一啲連投票權都唔應該擁有嘅窮鬼。獅子山經歷滄海桑田，百多年來歷盡幾次風浪，正好代表香港人不屈不撓嘅精神，所以有撐佔中人士，冒險爬石登頂，掛上「我要真普選」直幡。雖即被拆走，但已永存很多人心裏，「萬四」政客，你明白人民想你點做嗎？

第一手消息請下載on.cc東網iPhone/iPad/Android/Windows Phone Apps