政壇：搞搞政：學聯嗌總辭 泛民鬥龜縮
佔領行動進入僵局，繼今日搞電子投票外，學聯秘書長周永康日前更失驚無神呼籲泛民立法會議員發動五區總辭，建議一出，唔少泛民中人都「○晒嘴」，幾大泛民政黨都唔多想睬周永康嘅提議，大家一於鬥龜縮。要知道，自從兩年前通過遞補機制之後，辭職議員唔可以自己再選番，即係要讓個議席出嚟畀其他人選，而泛民中人鬼打鬼就叻，容乜易輸凸兼失議席o架。
設計圖片及對白
民望插水 辭職如自殺
其實，學民思潮早喺今年初已經提出五區辭職公投，因衝擊遞補機制論壇被判囚四周嘅立法會議員梁國雄（長毛）七月份一出冊後，亦揚言要發起總辭，但泛民一直都唔理，家吓周永康又踩多腳，泛民政黨中人唔係拖字訣、就係以黨內要傾嚟迴避。家吓泛民議員民望插水，現任泛民議員辭職嘅話，就只有提名新人參選，建制派如果乘機發功搶位，泛民仲有剩嘅？咁同政治「自殺」冇乜分別。
有人更話，咁樣會唔會出現泛民讓位、幫學聯抬轎嘅形勢呢？佢哋會唔會作出咁大犧牲？講到尾，泛民政黨都係首先為自己計數，五區總辭，講就好聽，做就百害而無一利，邊個肯呢？
